TARIXGA BIR NAZAR

Bosh sahifa / Axborot xizmati / Yangiliklar / Kundalik yangiliklar

TARIXGA BIR NAZAR

09.08.2025 09.08.2025 114

O‘zbekiston metallurgiya zavodi tarixidagi yangi davr 1970-yillarda korxonani kengaytirish va qayta qurish bo‘yicha yirik dasturning amalga oshirilishi bilan boshlangan edi. Bu dasturning asosiy tashabbuskorlari shu davrdagi O’zbekiston Respublikasi rahbari Sharof Rashidov va 1949-yildan buyon zavodga rahbarlik qilayotgan Ibrohim Muhammedov bo‘lgan edi.

Zavod bunga qadar hech qachon bunchalik tez sur’atlarda rivojlanmagan edi. Boshqacha qilib aytganda, zavodning ikkinchi tug‘ilishi boshlandi. 1972-yili mamlakatdagi eng yirik sirlangan po‘lat idishlar ishlab chiqarish sexining qurilishi boshlandi. 1974-yili 20 ming tonna mahsulot ishlab chiqarish quvvatiga ega bo‘lgan uning birinchi navbati ishga tushirildi.

O’tgan asrning 70-yillari o‘rtalarida zavodda hajmi va texnik jihozlanishi jihatidan tengsiz bo‘lgan Elektrda po‘lat eritish majmuasining qurilishi boshlandi. Bu Respublika miqyosidagi yirik bunyodkorlik jarayoni bo‘lib, unda o‘nlab qurilish tashkilotlari ishtirok etdi. Mamlakatning 20 ta shahridagi 347 ta korxona zavod uchun zarur uskunalar va materiallar yetkazib berdi.

Shaharning aholisi kam bo‘lgan, huvillab yotgan chetida shisha, beton va po‘lat konstruksiyali ulkan ishlab chiqarish binolari qad rostladi. Bu inshootlar Bekobodga kelgan har qanday insonning e’tiborini o‘ziga jalb qilmay qolmasdi.