NAZARIYA VA AMALIYOT O‘RTASIDAGI MUSTAHKAM KO‘PRIK

Bosh sahifa / Axborot xizmati / Yangiliklar / Kundalik yangiliklar

08.05.2025 08.05.2025 157

Metallurgiyada boy tarixiga ega bo‘lgan Bekobod shahrida metallurg-faxriylar pensiyada bo‘lsalarda o‘z bilimlarini yosh mutaxassislarga o‘rgatish orqali sohaning taraqqiyotiga hissalarini qo‘shayaptilar. O‘zbekiston Respublikasi Konchilik va metallurgiya sanoati faxriylari Kengashi Bekobod hududiy bo‘linmasi faoliyati avlodlar o‘rtasidagi bog‘liqlikni shunchaki so‘z bilan emas, balki amalda ham yaqqol isbotlab kelmoqda.

Bugungi kunda Kengash a’zolari “O‘zmetkombinat” AJ pensionerlarini ijtimoiy qo‘llab-quvvatlash bilangina cheklanib qolmaydilar. Ular yoshlarga ustozlik qilishadi, ta’lim tashabbuslarida ishtirok etishadi, universitetlar bilan hamkorlik qilishadi, yoshlarning tanlagan kasblariga bo‘lgan ishonchini oshiradilar. Kengash faoliyatining asosiy yo‘nalishlaridan biri murabbiylik tizimiga aylandi. Bu tizim orqali faxriylar bilim va tajribalarini talabalar va yosh mutaxassislarga o‘rgatmoqdalar.

Islom Karimov nomidagi Toshkent Davlat texnika universiteti hamda Moskva po‘lat va qotishmalar instituti Olmaliq filiallari kabi oliy o‘quv yurtlari bilan hamkorlik nazariya va amaliyot o‘rtasida mustahkam ko‘prik qurish imkonini bermoqda. Faxriylar talabalar uchun ma’ruzalar o‘qiydilar, ekskursiyalar va amaliyotlarni tashkil qiladilar, tajriba va malakalarini o‘rgatadilar.

“O‘zmetkombinat “AJda bu oliy o‘quv yurti talabalari uchun navbatdagi o‘quv-amaliy ekskursiya o‘tkazildi. Talabalar korxona bilan tanishishni kombinat tarixi muzeyidan boshladilar, u yerda metallurgiya gigantining shakllanishi, uning bosqichma-bosqich rivojlanishi, texnik yutuqlari va taniqli metallurglar, turli kasb egalari haqida tasavvurga ega bo‘ldilar.

Shundan so‘ng talabalar Elektrda po‘lat eritish, Navli prokatlash, Ferroqotishmalar ishlab chiqarish bo‘linmalarida bo‘lishdi. U yerda talabalar po‘lat eritish, prokat, ferroqotishmalar ishlab chiqarish jarayonlarini ko‘rib, metallurglarga yaratilgan mehnat sharoitlari darajasini baholash imkoniyatiga ega bo‘ldilar.

Yoshlarda texnologik jarayonlarning tafsilotlari alohida qiziqish uyg‘otdi. Ularning mohiyatini anglash maqsadida talabalar o‘zlariga hamrohlik qilgan tajribali mutaxassislar va faxriylarga turli savollar berishdi.

Ekskursiya yoshlarda katta taassurotlar qoldirish bilan birga, ularning bo‘lajak kasblarini yanada mukammal o‘rganib olishlariga qo‘shimcha rag‘bat berdi.