BOSHQARUV RAISI-BOSH DIREKTOR MUROJAATI

Bosh sahifa / Biz haqimizda / Korrupsiyaga qarshi kurash / Boshqaruv Raisi-bosh direktor murojaati

10.01.2024 02.07.2025 9667

BOSHQARUV RAISI – BOSH DIREKTOR MUROJAATI

KORRUPSIYA – BARQAROR TARAQQIYOTGA TAHDID

Aziz do‘stlar! Qadrli hamkasblar!

Korrupsiya har qanday jamiyatning siyosiy va iqtisodiy rivojlanishiga zarar yetkazadi. Jamiyatning ma’naviy axloqini yemiradi, qonun ustuvorligini kuchsizlantiradi, fuqarolar huquq va erkinliklarining jiddiy tarzda buzilishiga olib keladi. Uning domiga ilingan amaldor shaxsiy manfaatini davlat manfaatidan ustun qo‘yishi natijasida, mamlakat taraqqiyotiga hamda aholining aksariyat qismiga tuzatib bo‘lmaydigan zarar yetkazadi, chet ellik sheriklarda ham ishonchsizlik uyg‘otadi va ularni hamkorlikdan qaytaradi.

Korrupsiya, manfaatlar to‘qnashuvi bu shunchaki jinoyat yoki huquqbuzarlik emas, balki ma’naviy buzilish holatidir. Shunday ekan, mazkur illatlarga qarshi kurashda nafaqat davlat organlari, balki, jamiyat va umuman barcha fuqarolar va albatta kombinatimiz ishchi-xodimlari ham mas’uldirlar. Bizning eng muhim vazifalarimizdan biri xodimlarning korrupsiyaga qarshi huquqiy ongini oshirish hamda unga nisbatan murosasiz kurashishdir.

Kombinat va uning tarkibiy bo‘linmalarida korrupsiyaning oldini olish choralarini ko‘rish, uni keltirib chiqarishi mumkin bo‘lgan sabab va sharoitlarni barvaqt aniqlash va bartaraf etishga katta e’tibor qaratilmoqda. Xalqimizda kasallikni davolashdan ko‘ra, uning oldini olish afzal degan naql bor. Zero kasalni yashirsang, isitmasi oshkor etadi. Shunday ekan korrupsiya keltirib chiqaradigan oqibatlarni kutib turmasdan bu illatga oid jinoyat va huquqbuzarliklarni barvaqt aniqlash, ularga chek qo‘yish maqsadga muvofiq.

Korxona rahbar va mutaxassislari endilikda iqtisodiy samaradorlik, mablag‘larning o‘rinli va maqsadli sarflanishi, bunda ochiqlik va shaffoflikni ta’minlash uchun shaxsan javobgar ekanligini tushunib yetishlari lozim. Xorijiy hamkorlarimiz bilan aloqalarni mustahkamlash, xalqaro mavqe va nufuzimizni oshirish mas’uliyati ham shuni taqozo etmoqda.

Korrupsiyaning har qanday ko‘rinishiga murosasiz munosabatda bo‘lish kombinat tizimida faoliyat olib borayotgan har bir rahbardan tortib oddiy ishchi-xodimning kundalik hayot tarziga aylanishi kerak. Halollik, vatanparvarlik va shaxsiy mas’uliyatni o‘z faoliyatining asosiy qoidasiga aylantirgan holda, berilgan barcha vazifa va topshiriqlarni vijdonan, xolis va yuksak darajada amalga oshirish hayot tarzimizga aylanishi lozim.

Qayerdaki halollik va poklik ustuvor bo‘lsa, o‘sha joyga qut-baraka yog‘iladi, kutilgan natijalarga erishiladi. Buning aksi o‘laroq, harom-xarish aralashgan joydan baraka ko‘tariladi. Ba’zan bir nechta nopok xodim tufayli butun tizim yomon otliqqa chiqadi. Afsuski, odamzodning tabiatida falokatga yetaklovchi nafs atalmish illat mavjud. Aynan nafs, mol-dunyo ishtiyoqi insonni tamagirlikka undaydi. Shunday bo‘lmasligi uchun kombinatda mehnat qilayotgan har bir rahbar va muhandis-texnik xodimni o‘z vazifalarini adolatli va halol, xolis bajarishga chaqirib qolaman.

Aziz metallurglar!

Korrupsiyaga qarshi kurashish davlat va jamiyatning o‘zaro jipsligini talab etadi. Zero, bu yo‘nalishda olib borilayotgan ishlar fuqarolar, jumladan Sizlar tomondan ham faollik ko‘rsatilsagina, ko‘zlangan natijani berishi mumkin. Bu illatga qarshi kurashishda hech kim o‘zini chetga olmasligi shart. Sababi, birgalikda korrupsiyaga qarshi kurashsak, ijobiy natijaga erishish osonlashadi. Zero, korrupsiyaga qarshi kurashish har bir vijdonli insonning, demokratik jamiyat va davlatning burchidir!

Dilshod AXMEDOV, “O‘zmetkombinat” AJ Boshqaruvi raisi – Bosh direktor.